Fil de navigation

AYITI PA POU VANN, NI AN GWO, NI AN DETAY!!! Kòm wap vann yon pwojè, ou bijo chita sèlman sou sa w panse ki avantaj  pwojè a. Men yon prezantasyon onèt mande pou w ta gade dezavantaj yo tou. UN SE DIVISE EN DEUX!!! Tout avantaj toujou mache ak dezavantaj. Ou peche lè ou annik gade avantaj yo e nonpa dezavantaj yo. Sa montre se yon bagay wap foure nan gagann Pèp la pou li pa wè sa kap tann li. Tout sa w di yo se bèl pawòl. Men pou nou ta nayif ase pou pran pawòl sila yo pou levanjil ta vle di nou pat janm li, “Le Corbeau et Le Renard!” EREZMAN!!!  The Devil is in what you did not say (Demon yo/Mal la nan sa w pa di yo).
 
Kisa w pa di?
Sant Finasye Entènasyonal Zile LaGonav la se yon pwojè gwo peyi enperyalis yo vle mete anplas pou tout kalite malvèsasyon, koripsyon, krim finansye entènasyonal, evazyon fiskal pou enstitisyon finansyè ak kòporasyon miltinasyonal yo, blanchiman lajan ets. Se yon sant tou kap sèvi gwo miltinasyonal yo pou kontinye prije, peze-souse Pèp nan tout ti peyi sou planèt la. Yap sèvi ak Ayiti kòm yon plak tounant pou aktivite ilisit yo. Ou pale de posibilite $1.2 billion ale nan men leta Ayisyen. Montan sila a reprezante yon plòt krache parapò a sa miltinasyonal yo pral brase sou do peyi a. Li vreman sanwont pou yon “Ayisyen” prezante sa kòm yon avantaj ou kòm “enjeux du developpement national…”
 
Ann gade anplis! Jounen Jodi a, Ayiti se yon eta an fayit total. Leta Ayisyen an demisyonè, iresponsab, kowonpi ak neyokolonyal. Brèf, Ayiti se yon peyi kote ENPINITE, KORIPSYON, AK POURISMAN erije an mwayen de gouvènans.
 
Ou ta vini ak yon Sant Finansyè Entènasyonal nan Zile LaGonav jounen Jodi a antanke yon pwojè enperyalis se louvri vant peyi a pou etranje a fè vreman sa li pito nan savann koripsyon sa a. Menm lè peyi a ta jwenn ti bagatèl $1.2 billion, li tap brase nan koripsyon menm jan ak fon petwokaribe yo.
 
Nan yon sitiyasyon konsa, nou pa ka pran oserye moun kap pwopoze pou vini ak yon Sant Finansye Entènasyonal nan peyi a. Fòk nou ta kesyone seryezman senserite moun sila a. Sa se vagabondaj lè nou konsidere tout lajan tout gouvènman ki pase nan peyi a gagote nan dènye 60 tan nan peyi d Ayiti. Yo youn pa sèvi ak pakèt milyon, bilyon dola ki pase anba men yo pou devlope peyi a. Yo pito plen pòch yo!!! Nan sans sa a, se sèten palmantè konteste yo pral tande rekòmandasyon w yo e pran anje devlopman nasyonal pòch yo oserye!!!
 
 
Kanmarad Kawonabo